Achan os corpos sen vida dos dous traballadores sepultados nun edificio de Madrid

Os bombeiros acharon os corpos sen vida dos dous traballadores que este martes quedaron sepultados baixo unha laxa de formigón nas obras dun edificio do distrito madrileño de Fuencarral-O Pardo, segundo confirmou Emerxencias Madrid.

Tras preto de oito horas de traballo, en que necesitaron empregar un guindastre de gran tonelaxe, os servizos de emerxencias recuperaron os cadáveres de dous homes. Segundo explicou un dos seus compañeiros, cos que levaban seis meses traballando na citada obra, chamábanse Ngolo, nixerino duns 50 anos, e Ángel, un colombiano duns 30.

Unha terceira vítima, chamado Hassan, quedou ferida e foi trasladada ao Hospital da Paz cunha fractura de perna e múltiples contusións, pero non se teme pola súa vida.

No lugar do accidente laboral, un edificio en rehabilitación situado na confluencia das rúas Lezama e Llodio, atópase a comitiva xudicial, para realizar o levantamento dos corpos, e os servizos funerarios. As circunstancias do accidente están a ser investigadas polos axentes do Grupos de Sinistralidade Laboral da Comisaría de Coordinación Xudicial da Policía Municipal de Madrid.