Alerta por unha vaga de roubos en locais dos Tilos, no concello de Teo

Tres asaltos no último mes e medio. A cafetería do Club Os Tilos levou a peor parte da vaga de roubos que ten en alerta os veciños da urbanización. Os ladróns forzaron a mesma fiestra nas tres ocasións e foron directos á caixa.

"A primeira vez colleunos de sorpresa e levaron 450 euros da caixa, a segunda levaron uns 200, o mínimo de apertura, e na última como non había cartos arrincaron a caixa coa impresora dos tíckets", explica Ana Suárez, cociñeira da cafetería.

A poucos metros do club, o centro comercial tamén recibiu a visita dos cacos. 

"Forzaron a porta e romperon os cristais da porta lateral. No meu bar forzaron a persiana pero non deron entrado. Na mercería si entraron e levaron produtos e cartos. Eu antes non tiña medo de pechar tarde o bar, agora si, hai pouca luz e xente que ven ao parque de noite", di Yohani Márquez, da Cafetería Piccolo.

Nos baixos do complexo parroquial forzaron a porta da escola infantil e unha fiestra da asociación ArcosTilos. Sospeitan que a intención era entrar á igrexa polas súas aulas. Non o lograron, pero deixaron estragos e sensación de inseguridade entre os veciños.

"Queremos máis control da seguridade sobre todo polas noites, a policía local de Teo non ten quenda de noite e nos gustaría que pasaran de cando en vez. Especialmente con isto que está a pasar, con tantos roubos e intentos nun mes na mesma zona", comenta Tatiana Santos, unha das coordinadoras da asociación ArcosTilos.

Ante a petición da asociación de veciños, a Garda Civil do Milladoiro comprometeuse a reforzar a vixilancia. Tamén o fixo a Policía Local, na medida das súas posibilidades. A intención é disuadir os ladróns e que a vaga de roubos non siga sumando novas vítimas.