Alertan da presenza dunha pantera nunha parroquia de Pantón

Ata en dúas ocasións, os veciños da parroquia de Castillón, en Pantón, alertaron a Consellería de Medio Ambiente da presenza dunha pantera. A primeira vez foi o ano pasado, e de novo este mesmo outono.

Nos dous casos foi enviado á zona un axente, que durante días tratou, en van, de dar con algún tipo de rastro dun gran felino. A última vez, supostamente, foi avistado nun prado do lugar de Galegos, cuxa dona mesmo viu pegadas dun animal de grandes dimensións que non identificou.

Mari Luz Varela, dona do prado: "Eu ía polas vacas e vin unhas pasadas grandes, que non sei de que bicho eran. Despois, o touro non mo tocou para nada nin un becerro acabado de nacer que estivo aí".

Cesáreo Rodríguez, encargado de Medio Rural do Concello de Pantón: "A este prado vin cun axente de Medio Ambiente. Estivemos con dous veciños e un deles dixo que si que a vira e que marchara amodo. Os técnicos seguiron vixiando durante días, pero non avistaron nada".

Malia ser presuntamente avistada en varias ocasións, tampouco foi captada imaxe ningunha que acredite a presenza dunha pantera. Segundo sinalan as autoridades, de existir realmente, todo apuntaría a un caso de tráfico de animais exóticos.

Cesáreo Rodríguez, encargado de Medio Rural do Concello de Pantón: "A única lóxica que ten é se alguén trouxo un animal exótico, pero non lle vexo xeito. Eu, verdadeiramente, non o creo".

Tampouco se descarta que realmente se tratase doutro animal grande, máis común e tamén de cor negra, como pode ser un can ou mesmo un gato. En calquera caso, o certo é que o misterio da pantera de Pantón segue sen resolverse.

O prado onde supostamente foi avistada a pantera por última vez, este mesmo outono