Villares: "A Xunta defenderá as súas competencias para preservar a lei do litoral"
Villares: "A Xunta defenderá as súas competencias para preservar a lei do litoral"
O conselleiro do Mar critica que a decisión do Goberno central de recorrer contra a lei deixa "o sector sumido na incerteza"
Lembra que o Observatorio Galego do Litoral avala que a lei se axusta á Constitución
Desde a consellería do Mar volven defender a lei autonómica de xestión e ordenación do litoral de Galicia e esixen coñecer o informe do Consello de Estado sobre o que basea o recurso presentado polo Goberno central ante o Tribunal Constitucional.
"Paréceme que é totalmente absurdo por parte dun Goberno que toma esta decisión o último día a última hora sen ter contacto coa Administración da Xunta e cando está negociando con outras comunidades cousas máis que discutibles dentro da Constitución", dixo Alfonso Villares.
O conselleiro do Mar facía estas declaracións na inauguración da depuradora e cetaria de mariscos Crebamar.
Segundo a Xunta, a decisión do Goberno creou moita "incerteza no sector" das industrias do mar en toda Galicia e insisten en que "hai moitos postos de traballo en risco". A vindeira semana desde a Xunta reuniranse co sector e estudan recorrer contra a suspensión da lei galega do litoral.
"A Xunta o que vai facer é defender as nosas competencias e a nosa lei, que está ditada e examinada polas cabezas máis lúcidas que ten Galicia dentro da Administración e dentro da Universidade. Defenderemos as nosas competencias onde haxa que defendelas", engadiu.
Destacan ademais que o Observatorio Galego do Litoral avala que a lei se axusta á Constitución.
![](https://img-g24-crtvg.flumotion.com/prog24/2023/20231014/XUNTAALEILITORAL_frame_2942.png)