Máis do 96 % dos condutores non aprobarían hoxe o carné de conducir

Se nos volvemos presentar ao exame teórico para sacar o permiso de conducir, o máis probable é que o suspendamos. Os condutores recoñéceno.

 "Sinceramente, supoño que o suspendo".

"Fixo, e que á parte vaste esquecendo moitas das normas que están actuais e non nos actualizamos tampouco", comentan varios condutores

Cos datos que manexa a DXT máis dun 96 % dos condutores veteranos non pasarían a proba a día de hoxe.

"Porque hai moitas cousas novas, novas normativas, novos sinais e a xente non se recicla neste senso", apunta Cristina Sinde, profesora da autoescola SDS.

O tráfico evoluciona e con el os sinais e non sempre son de fácil interpretación.

 "Algunha por intuición pódela ir sacando, pero outras veces non", continúa a profesora.

Non identificalas é non cumprilas, e iso é motivo de sanción. Tamén teriamos problemas para superar a proba práctica polos malos hábitos que imos collendo co tempo.

"Pois si, a forma de coller o volante, o levar unha man na panca de cambios, o poñer o punto morto de parar de todo o coche... pois son hábitos que se van collendo co tempo e que aí quedan", explica Cristina Sinde.

A DXT aconsella consultar periodicamente o catálogo de sinais para evitar algunha que outra sorpresa ao volante, algo que os condutores ven necesario.

"Debiamos facelo xa por iniciativa propia".

 "Un pequeno repaso nunca vén mal, a verdade".

"Procuro cumprir as que vexo na estrada, e, se algunha non a coñezo, intento informarme de que significa", contan os condutores.