Arquivan a causa contra o exalcalde Nené Barral ao non poder xulgalo por motivos de saúde
Arquivan a causa contra o exalcalde Nené Barral ao non poder xulgalo por motivos de saúde
O tribunal ordenou á defensa do exalcalde que entregue na Audiencia un informe cada dez días coa "evolución do estado de saúde" do seu defendido
A Audiencia de Pontevedra arquivou de maneira provisional a causa aberta contra o exalcalde de Ribadumia (Pontevedra), José Ramón Barral Martínez, coñecido como Nené Barral, ao non poder xulgalo por motivos de saúde.
Barral foi detido hai 21 anos, en maio de 2001, tras a incautación de 432.000 paquetes de tabaco camufladas nun barco que atracou no porto de Vigo, operación pola que o investigan por delitos de contrabando de tabaco, suborno e asociación ilícita.
Para o exalcalde, que gobernou Ribadumia entre 1983 e 2001 nas filas de Alianza Popular e o Partido Popular, a Fiscalía pide unha condena de 10 anos e medio de prisión e unha multa de 15 millóns de euros pola súa actividade continuada no ámbito do contrabando de tabaco.
Está implicado nesta causa xunto a outras oito persoas, entre elas o seu irmán Feliciano Barral, mentres que outros tres dos acusados inicialmente faleceron antes de que este caso chegase a xuízo, tras máis de dúas décadas de instrución.
Tras varios aprazamentos previos e a anulación previa dunha parte das escoitas telefónicas, o xuízo sinalouse para este venres 1 de setembro coa intención de celebrar a vista oral, pero a avogada de Nené Barral presentou un informe forense que acredita a súa enfermidade.
Ante esta situación, a maxistrada da sección cuarta da Audiencia de Pontevedra, Nélida Cid, preguntou ás partes se o xuízo podería celebrarse sen a presenza de Barral, xulgándoo a el máis adiante cando se recupere dos seus problemas de saúde.
Pero tanto a Fiscalía como a Avogacía do Estado sostiveron que "non é posible" xulgar esta causa de maneira separada ante a súa "posición central e directiva" en toda esta trama, polo que de acordo tamén cos avogados defensores apoiaron a suspensión do xuízo.
O tribunal ordenou á defensa do exalcalde que entregue na Audiencia un informe cada dez días coa "evolución do estado de saúde" do seu defendido.
A decisión de arquivar a causa de maneira provisional adoptouse para evitar que corran os prazos procesuais e se produza unha posible prescrición dos delitos polos que será xulgado.
