Arranca con éxito a campaña de vieira na ría de Ferrol

Rápido e sen problemas. Así traballaron os 25 mariscadores das confrarías de Ferrol, Mugardos e Barallobre nesta primeira xornada da campaña da vieira.

Tras dous anos sen poder extraer este bivalvo por mor dos altos niveis de toxina, os mariscadores chegaban a porto co cupo diario permitido, 60 quilos de vieira por tripulante.

Tras o éxito do primeiro día, confían en que as análises sigan sendo favorables para poder concluir esta campaña que calculan que durará un mes.

Agora seguirán traballando na vieira ata o xoves e despois agardan poder continuar coa extracción a vindeira semana.