As chuvias fan saír cogomelos ás portas do verán
As chuvias fan saír cogomelos ás portas do verán
Os cantarelos son os máis abundantes, pero tamén hai champiñóns e boletos
Entre as variedades tóxicas, podemos atopar amanitas phanterina
Alejandro Mínguez, divulgador micolóxico, e a súa filla chegan ao noso encontro coa cesta mediada. Os máis abundantes, os cantarelos. "Un cogomelo que ten un cheiro moi agradable, afroitado, a pexego. É moi apreciado na cociña. Pode deshidratarse e usarse durante todo o ano", explica Alejandro.
Tamén atoparon champiñóns, e ata un boleto. A nena, que foi aos cogomelos por primeira vez aos quince días de nacer, toma boa nota das propiedades de cada variedade. O máis importante, insístelle o pai, é diferenciar os que son tóxicos, que tamén saíron con estas chuvias.
Alejandro Mínguez, divulgador micolóxico: "Aínda que a amanita faloides non é habitual que apareza, si pode aparecer a phanterina, que tamén é tóxica e, en cantidades máis altas que a faloides, mortal".
A chuvia das últimas treboadas e as temperaturas suaves explican esta proliferación de cogomelos. Iso si, non se prevé que esta nova temporada dure moito, porque os cogomelos, coma moitos humanos, sofren por riba dos trinta graos.
