Atopan un portal de Cambados cheo de feces por terceira vez

Os veciños e veciñas pensaron a primeira vez que fora unha falcatruada, pero xa van tres as veces que unha persoa esparexe feces neste portal. No tirador da porta, nos timbres do porteiro automático, nas paredes e ata no teito.

Están preocupados porque din que ten que ser unha persoa que ten que estar perturbada mentalmente e temen ter algún enfrontamento se o atopan no portal ou mesmo sufrir algunha agresión.

Sospeitan de que poida tratarse dunha vinganza contra alguén que reside no edificio, pero todo son hipóteses. Na comunidade expúxose a posibilidade de instalar cámaras de vixilancia para sorprender a persoa ou persoas responsables na allada, pero a proposta non prosperou.

"A min xa me cheirou cando saín da porta da casa, chegue ao portal e xa non saín por aquí fun polo garaxe, pero estaba feito un noxo". 

"Temos medo de saír un día coas criaturas e encontrarnos a esta persoa, que ben non pode estar, e que faga calquera outra cousa. Como fixo isto un día dálle unha coitelada a un ou entra nunha casa". 

"A preocupación é que poida pasar algo máis, é antihixiénico, os rapaces cando baixan ao colexio e atopan isto é realmente noxento".   

Coincidiu no tempo coa aparición de rodas picadas en varios coches estacionados na zona. Descoñécese hai relación, pero os feitos xa se puxeron en coñecemento da Policía Local e a Garda Civil e piden que se teñan en conta o problema.

O que teñen claro é o propósito de provocar a maior incomodidade posible. Tamén ocasiona un custo adicional a hora de limpar. A empresa que atende o edificio xa lles dixo que non se facía cargo se se repetía este tipo de desfeita.