Atracan cunha arma de fogo unha sucursal bancaria de Camariñas

Un home atracou cunha arma de fogo unha sucursal bancaria situada no municipio coruñés de Camariñas. Fuxiu cunha cantidade de diñeiro cuxa contía tratan de determinar as autoridades.

En concreto, o suceso tivo lugar ás 13.10 horas na oficina do Banco Santander situada na Ponte do Porto desta localidade da Costa da Morte.

Segundo informou a Garda Civil, o individuo entrou no banco e supostamente ameazou os empregados cunha arma de fogo para que lle abrisen a caixa, de onde subtraeu unha cantidade de diñeiro que as autoridades tratan de determinar.

As forzas da orde tratan de dar co paradoiro do presunto autor. Da investigación fíxose cargo a Policía Xudicial de Corcubión.