Atracan cunha pistola unha gasolineira do Porriño

Atraco á man armada nunha gasolineira do Confurco, no concello do Porriño, na estrada que comunica este municipio co lindeiro de Ponteareas.

Ocorreu arredor das dez e media da pasada noite cando un individuo coa cara cuberta por un pasamontañas ameazou unha empregada do establecemento empuñando unha pistola de aspecto real.

Conseguiu levar uns 600 euros da caixa e fuxir a pé uns metros ata un coche, en que presuntamente o estaba agardando un cómplice.

Deseguido a Garda Civil e as policías locais do Porriño e de Ponteareas, en labores de apoio, fixeron unha batida nos arredores, pero, polo momento, non deron cos atracadores.