Cada galego consome menos de 100 gramos de cabrito ao ano

Unha alimentación a base do que produce o monte e sempre ao aire libre. Así viven as nais dos cabritos galegos. Uns cabritos que saen á venda alimentados só con leite, o que os converte nunha das carnes máis saudables que se pode atopar no mercado e moito máis sa e saborosa que as das granxas intensivas doutras especies.

"A xente non ten tempo de preparar o cabrito no forno. Ese debe de ser un motivo, porque non se entende o baixo consumo sendo a carne tan sa", explica Antonio Tucci, da gandería Val do Conso.

Pero o certo é que cada vez se consome menos cabrito. Cada galego come menos de 100 gramos de media ao ano e moi rara vez se degusta fóra de vodas, festas ou Nadal e Aninovo. Ademais, os gandeiros ven como soben os custos e baixan os prezos en orixe.

"E tampouco o prezo en orixe subiu. En cambio os custos disparáronse nos últimos tres anos, o que aínda afecta máis", son datos de Amaia Santamarta, técnico de OVICA

En Galicia sacrifícanse nos matadoiros uns 3.000 cabritos cada ano, pero a maior parte das vendas fanse entre particulares ou á restauración. Estímase que a produción é dunhas 21 toneladas anuais. Outro problema é que a media de cabras por explotación é de oito exemplares.