O PIB creceu un 3,2 % en 2024, cinco décimas máis que en 2023, impulsado polo consumo e o investimento

A economía española creceu un 3,2 % en 2024, cinco décimas máis que en 2023, tras manter no último cuarto do ano un avance do 0,8 %, segundo confirmou este mércores o Instituto Nacional de Estatística (INE) coa publicación dos datos de Contabilidade Nacional do cuarto trimestre de 2024.

Con este crecemento anual do 3,2 %, que o Ministerio de Economía atribuíu ao impulso do consumo e o investimento, a economía española encadea catro anos de avances.

A demanda nacional contribuíu con 2,8 puntos ao crecemento económico de 2024, dato 1,1 puntos superior ao do ano anterior, sete décimas menos que en 2023. O valor a prezos correntes do PIB para o ano 2024 situouse un 6,2 % superior ao de 2023.

"España liderou un ano máis o crecemento na zona euro, cun aumento do PIB 3,5 veces superior, e foi a que máis achegou ao crecemento da eurozona, o 50 % do total", destacou o ministro de Economía Carlos Cuerpo, nunha valoración sobre os datos do INE remitida aos medios de comunicación.

Segundo resaltou o ministro, os datos publicados por Estatística poñen de manifesto que España mantén un crecemento equilibrado, sostible e robusto, capaz de seguir xerando emprego de calidade e mellorando o poder adquisitivo das familias, o cal é especialmente relevante no contexto de incerteza internacional.

No cuarto trimestre do ano pasado, o crecemento interanual do PIB foi do 3,4 %. Este crecemento foi consecuencia exclusivamente da demanda nacional, que achegou 3,6 puntos ao incremento do PIB, fronte a unha contribución negativa da demanda externa de dúas décimas.

No que respecta ao avance trimestral do PIB entre outubro e decembro de 2024, que de novo foi do 0,8 %, a demanda nacional achegou 1,2 puntos, fronte a unha contribución negativa do sector exterior de catro décimas.

O consumo dos fogares aumentou un 1 % no cuarto trimestre do ano pasado, dúas décimas menos, en tanto que o gasto público moderou o seu crecemento dous puntos, ata o 0,3 %. Por contra, o investimento pisou o acelerador e incrementou un 3,5 % entre outubro e decembro, en contraste coa caída do 1,3 % experimentada no trimestre previo.

O Ministerio de Economía resaltou ademais que en 2024 se crearon case 500.000 postos de traballo, o número de horas traballadas incrementou un 2,8 % en taxa interanual e mantívose a mellora interanual da produtividade por hora, cun avance do 0,6 %.