Desarticulada unha banda implicada en roubos en máis de medio cento de vivendas nas provincias de Lugo e A Coruña

A Garda Civil, no marco da operación Gabor, detivo os oito integrantes dunha banda organizada especializada na comisión de roubos con forza no interior de vivendas habitadas situadas nas provincias de Lugo e A Coruña. En concreto, impútaselles a comisión de 56 asaltos en domicilios.

Segundo informa a Garda Civil nun comunicado, o modus operandi era similar en todos os delitos: fracturaban un cristal para acceder ao interior dos domicilios para apoderarse de bens mobles, armas de fogo e ferramentas profesionais.

Nesta operación logrouse recuperar diñeiro en efectivo, xoias, reloxos de alta gama, 710 gramos de substancias estupefacientes, útiles de pesada e envasado. Para a comisión dos seus ilícitos facían uso de polo menos unha vintena de vehículos a nome de terceiras persoas non vinculadas directamente coa banda.

Aos integrantes desta banda impútanselles os delitos de pertenza a grupo criminal, roubo continuado, tráfico de armas, tráfico de drogas, contra a seguridade viaria, simulación de delito e desobediencia aos axentes da autoridade.

O líder do grupo ocultaba o botín en coches aparcados na vía pública en Lugo

O xefe da organización distribuía, ocultaba e almacenaba o botín obtido dos asaltos no interior de vehículos estacionados na vía pública en diferentes rúas da cidade de Lugo. A este individuo interviñéronselle catro pistolas e unha arma prohibida.

O pasado 1 de agosto, o líder da banda e outro presunto autor dos feitos foron postos a disposición xudicial e decretouse o seu ingreso en prisión.

Os axentes destacan que se logrou desarticular así a unha das bandas máis activas na provincia de Lugo nos últimos anos. Continúase buscando os propietarios de parte dos obxectos intervidos, o que pode dar lugar a vincular a esta banda con outros asaltos a vivendas ocorridos nesta provincia.