Deteñen un veciño da Coruña acusado de estafa tras lograr datos persoais nunha web de alugueiro de vivendas

O Equipo @Coruña da Garda Civil da Coruña, especializado en asesoramento, prevención e resposta en materia de ciberdelincuencia, detivo a un veciño da Coruña como presunto autor de estafar a varias persoas tras obter os seus datos persoais nun portal web de alugueiro e venda de vivendas.

A investigación comezou por mor das denuncias interpostas polas vítimas nas localidades de Culleredo, Oleiros, Boiro e Lorca,  cunha serie de pautas coincidentes. Nelas, indicaban recibir cargos de entidades comercializadoras de créditos persoais non solicitados e que ademais lles reclamaban distintas cantidades por falta de pagamento de débedas.

Durante a investigación, os axentes comprobaron que todos os denunciantes realizaran a procura de inmobles na Coruña a través dun coñecido portal web de alugueiro e venda de vivendas.

Modus operandi 

O detido insería neste portal anuncios falsos de alugueiro ou venda de pisos, obtendo con iso os datos dos interesados, nome, fotografía do DNI etc..., e mais o importe do suposto depósito de alugueiro. Unha vez obtidos os datos persoais, utilizábaos para realizar diversas compras de efectos tecnolóxicos en diversas plataformas web, aboando os mesmos a través de microcréditos dos que os titulares eran as vítimas dos enganos, que descoñecían a existencia dos mesmos ata que lles eran reclamados polas entidades comercializadoras os importes non abonados.

Tras a análise da información solicitada, os axentes lograron a identificación plena do presunto autor dos feitos, resultando ser un veciño da Coruña, coñecido da policía por ilícitos do mesmo tipo.

Unha vez coñecida a identidade, a Garda Civil procedeu á detención desta persoa como presunto autor dun delito de estafa continuada e varios de falsidade documental.

Recomendacións

Ante feitos destas características, a Garda Civil recomenda, como norma xeral, limitar os datos ou usar un filtro en branco e negro, así como tachar algúns datos que son innecesarios ou pixelalos.

Deste xeito, explica, asegúrase que se expón a mínima información posible. Tamén sinala que se debe enviar a imaxe do DNI en branco e negro a todas aquelas persoas que o solicitaran e aconséllase establecer unha marca de auga no documento de identidade, así como escribir un texto sobre el no que se especifique o motivo polo que se está compartindo unha imaxe do documento e a que persoa ou destino vai a información.