Deteñen o pai do bebé que caeu desde un quinto piso en Vitoria e se encontra en estado crítico

A Policía Local de Vitoria detivo o pai do bebé de 11 meses que se precipitou desde a xanela dun quinto piso este xoves pola tarde. Foi trasladado con vida ao Hospital de Txagorritxu, aínda que se atopa en estado crítico.

O suceso tivo lugar ás 16:45 horas deste xoves, cando o neno caeu ao baleiro desde a ventá dun edificio de vivendas de 15 alturas que non ten balcóns nin terrazas. O inmoble está situado na confluencia da avenida 8 de Marzo coa rúa Madrid do barrio de Salburua.

Aínda que polo de agora non se determinou con exactitude que puido ocorrer, a Policía Local detivo o pai, de 21 anos, que posteriormente foi traspasado á Ertzaintza, que se fixo cargo das investigacións para esclarecer as causas da caída do bebé.

O home está a ser investigado como presunto autor dun delito de lesións por imprudencia, aínda que no caso de que finalmente o bebe morra imputaríaselle un delito de homicidio imprudente, informaron no Departamento de Seguridade do Goberno Vasco. Polo momento descoñécese o alcance das feridas que sufriu o neno, aínda que o seu prognóstico é crítico, sinalaron as mesmas fontes.

O bebé, do que nun primeiro momento se dixera que tiña 20 meses e non 11, podería padecer algunha fractura cranial polo impacto contra o chan, xa que sangraba polos oídos no momento EN que foi atendido polos sanitarios.

O neno foi trasladado nunha UVI móbil ao Hospital de Txagorritxu da capital arabesa, pero podería ser derivado ao Hospital de Cruces, en Biscaia, onde hai unha unidade especializada de Pediatría.