Deteñen o presunto autor de varios incendios en contedores de Ribeira
Deteñen o presunto autor de varios incendios en contedores de Ribeira
Foron os bombeiros de Boiro os que fixeron fronte a varios incendios en varios puntos da localidade que se orixinaron case de forma simultánea
![Un dos contedores calcinados en Ribeira (Consorcio Contraincendios da Coruña)](https://img-g24-crtvg.flumotion.com/prog24/2024/20240625/colectorcalcinadoribeira.jpg)
A Policía Nacional detivo un home como suposto responsable dunha vaga de incendios que afectou unha decena de colectores de lixo en Ribeira a pasada madrugada.
Segundo informa o 112 Galicia, os lumes empezaron pouco antes das 2:00 da mañá xunto ao Colexio Sagrado Corazón e fóronse sucedendo varios máis ata a súa completa extinción, pasadas xa as 3.00.
A central de emerxencias destaca a "esencial" colaboración dos veciños nas súas chamadas ao 112, xa que isto facilitou a posta en marcha dos operativos e evitar a propagación das lapas a outros bens, como mobiliario urbano e vehículos.
Foron os bombeiros de Boiro os que fixeron fronte a estes incendios que se orixinaron case de forma simultánea, o que lles obrigou a desdobrarse. En total, houbo dez contedores calcinados: catro preto do Colexio Sacro Corazón, tres na zona da praia da Ameixida, dous próximos á caseta de socorrismo, outro no bar e outro en Area Secada.
Os axentes da Policía Nacional e a Local non tiveron dúbidas sobre a intencionalidade do lume, polo que procederon á localización e posterior detención dun home como posible causante.