Un incendio en Tarragona obriga a evacuar 1.500 persoas e non puideron saír 29 trens

O incendio que se declarou este xoves ao arder un autocar na N-240 ao seu paso por Montblanc está estabilizado.

1.500 persoas tiveron que ser desaloxadas do Cámping Montblanc Park e 29 trens da liña AVE Madrid-Figueres non puideron saír de diferentes estacións.

O incendio orixinouse ao queimarse un autobús sen pasaxeiros. As lapas estendéronse á masa forestal próxima.

Polo momento non se rexistraron persoas feridas de gravidade, aínda que o Sistema de Emerxencias Médicas informa de que trasladaron a centros sanitarios tres persoas feridas en estado leve.

Os Bombeiros da Generalitat comezan a retirarse de maneira progresiva, deixando efectivos para evitar focos secundarios.  Na zona traballaron 35 vehículos e nove helicópteros.

O Concello de Montblanc abriu o seu centro de lecer e cívico para atender os campistas desaloxados á espera de que nas próximas horas poidan regresar ao cámping.

Segundo os datos facilitados polos Axentes Rurais o lume afecta a unha superficie dunhas 25 hectáreas, aínda que son datos provisionais.

Por mor deste incendio mantense cortada a N-240 en Montblanc e desvíase o tráfico pola A-27 en sentido norte e pola C-14 en sentido sur.

Ademais, a A-27 está cortada de Valls a Montblanc en sentido Lleida e hai desvíos pola N-240 e a AP-2.