Detida en Leiro unha parella por substraer os seus dous fillos menores nos Países Baixos
Detida en Leiro unha parella por substraer os seus dous fillos menores nos Países Baixos
A parella, reclamada pola xustiza neerlandesa, foi posta a disposición da Audiencia Nacional
Os nenos ingresaron nun centro de menores
![](https://img-g24-crtvg.flumotion.com/prog24/2024/20240531/EVITARCALOTESBOLSO_frame_5055.png)
Unha parella foi detida na localidade ourensá de Leiro por mor dunha alerta para o seu arresto e entrega por parte da xustiza neerlandesa por subtraer os seus dous fillos menores nos Países Baixos sen autorización.
Nun comunicado, a Policía Nacional explicou a detención tivo lugar o pasado 12 de xuño por mor duns feitos que se produciron con motivo dunha visita vixiada aos menores, xa que, a pesar de ser os proxenitores, retiráraselles a custodia.
Os fuxidos estaban reclamados xudicialmente como responsables de "secuestro, detención ilegal e toma de reféns" pola subtracción de dous dos seus fillos.
Ante iso, membros da brigada provincial da policía xudicial de Ourense levaron a cabo unha investigación para a localización da parella que podería atoparse en Leiro, onde un dos reclamados ten raizames familiares.
Os axentes estableceron un dispositivo especial para a localización e detención da parella na citada localidade ourensá, onde foron identificados acompañados dos seus fillos.
A Policía Nacional informou o resultado das investigacións ao órgano xudicial neerlandés. Ademais, unha vez finalizadas as dilixencias, os reclamados foron postos a disposición do Xulgado Central de Instrución número 6 da Audiencia Nacional.
Os menores, que quedaban nunha situación de desamparo, foron ingresados de forma provisional nun Centro de Protección de Menores, previa coordinación coa Xunta.