Detido un garda civil que se atrincheirou durante horas na súa vivenda do Carril
Detido un garda civil que se atrincheirou durante horas na súa vivenda do Carril
A alarma saltou ao romper a pulseira de control que ten que levar por estar acusado de maltrato á súa exmuller
Entregouse ás catro da madrugada, despois da intervención do Grupo Operativo Especial de Seguridade da Policía, GOES
Noite de berros, incerteza e tensión na rúa Travesa da Xalda, no Carril.
"Empecei a escoitar berros, era o veciño do ático que estaba atrincheirado cunha persoa dentro".
"Escoitamos berros, moitos berros, eu creo que estaba bébedo", comentan os veciños.
O home, un garda civil en activo e sen arma, atrincheirouse durante horas na compaña dunha amiga que, segundo afirma, non estaba retida.
"Ao contrario, el dicíame que marchase e eu díxenlle que non o ía deixar só", di Esther Leonardo, a muller que o acompañaba.
A alarma saltou cando rompeu a pulseira de control de afastamento que ten que levar por estar acusado de maltrato á súa exparella. Os axentes fixeron varios intentos de negociar para que saíse da casa, pero negouse a berros mentres retransmitía o sucedido nas súas redes.
A policía acordoou a zona e alertou os veciños de que baixaran as persianas.
"Saímos a fóra e a policía dixo que nos retirásemos, que podía ir armado".
"Pensamos que podía cometer algunha tolería, unha explosión, abrir o gas, pero os axentes fixeron un bo traballo, tiveron moita paciencia e lograron resolvelo", comentan as veciñas.
Finalmente foi detido polo grupo de operativos especiais da policía, GOES, que logrou que se entregase a iso das catro da mañá sen lamentar feridos.
