Detido un profesor de relixión acusado de agredir sexualmente seis nenos en Valencia
Detido un profesor de relixión acusado de agredir sexualmente seis nenos en Valencia
A policía rexistrou o lugar de traballo e o domicilio do arrestado e tomoulles declaración aos seus compañeiros e á súa contorna familiar
O detido xa pasou a disposición xudicial este venres, ao igual que o material apreixado polos axentes (Forta).
A Policía Nacional detivo un profesor de relixión de 47 anos acusado de agredir sexualmente seis nenos de educación infantil dun colexio da provincia de Valencia.
Segundo confirmou a EFE a Policía, a detención tivo lugar á primeira hora deste xoves; o arrestado pasou este venres a disposición xudicial.
A investigación por estes feitos comezou o pasado 7 de outubro, cando unha nai denunciou na comisaría a presunta agresión sexual ao seu fillo por parte do detido.
No marco desta investigación, os axentes procederon ao rexistro das instalacións onde exercía o docente, así como do domicilio do sospeitoso, e interviñéronse diversos dispositivos electrónicos e documentación.
Do mesmo xeito, os policías tomaron declaración a persoal docente do centro escolar do profesor e a varias persoas da súa contorna.
Os feitos, que avanzou o diario Levante e cuxos detalles se manteñen baixo segredo para non prexudicar aos menores nin á investigación, foron trasladados á Fiscalía de Menores e á Consellería de Educación.
