Científicos do CSIC de Vigo analizarán o estado do cabaliño de mar na costa española

Son expertos na camuflaxe e logran confundirse co medio para pasar desapercibidos. En Galicia existen dúas especies de cabaliños de mar. Agora un proxecto do CSIC financiado polo Ministerio para a Transición Ecolóxica estudará estas e outras poboacións en todo o litoral español. xa que hai moi pouca información para unha especie de vital importancia. Jorge Urcera, investigador do IMM do CSIC:

"Viven asociados a pradeiras de vexetais que serven a súa vez de nicho ecolóxico doutras especies con valor comercial, coma o choco, o polbo e moitos tipos de crustáceos".

Ese estudo, de doce meses de duración, reportará información moi importante do estado das poboacións salvaxes. E para iso contarán coa axuda de mergulladores, entidades e confrarías de pescadores, para poder chegar a todos os recunchos da costa, que poderán subir a unha plataforma.  Sira Pereira, investigadora do IMM do CSIC:

"Se teñen unha fotografía, fantástico; se teñen datos do tipo de fondo e do tipo de hábitat, xenial, ou da profundidade do sitio xeográfico onde se atopa".

O proxecto, que xa botou a andar, presentouse esta tarde en Vigo. Estará pilotado dende aquí. Toda a información servirá para determinar cales son as áreas críticas destas poboacións, castigadas pola contaminación e o cambio climático, e permitirá levar a cabo medidas de conservación.

Son especies vulnerables que viven a uns catro e dez metros de profundidade. Con todo, na baía de Cádiz xa atoparon exemplares destes cabaliños a uns cen metros ao fondo. Un récord mundial dentro desta especie e unha información moi valiosa, chea de incógnitas, que terán que descifrar.