Diploma olímpico para Caetano Horta

Caetano Horta quedaba fóra da loita polas medallas hai dous días. Xunto coa súa parella, Dennis Carracedo, non lograron meterse entre os tres mellores tempos da súa semfinal. Pero a súa participación olímpica non rematou aí.

O padexeiro galego competiu esta mañá na final B da modalidade de dobre scull lixeiro, onde podía acadar aínda un diploma olímpico. Horta e Carracedo comezaban a proba en cabeza sendo a embarcación máis rápida nos primeiros 1000 metros. Francia situábase preto dos españois, que continuaban a liderar a proba a falta de 500 metros para o seu final.

Precisamente foron os padexeiros franceses quen aumentaron o ritmo no último cuarto da final B. O noiés e o seu compañeiro seguíronlles o ritmo, pero finalmente cederon o primeiro lugar entrando na meta a menos dun segundo dos locais. Horta pon o remate a súa actuación en París cunha segunda posición na final B, o que lle outorga un diploma olímpico, o segundo, logo de acadalo tamén nas Olimpíadas de Tokyo.