Dous detidos en Ribeira por agredir unha parella de policías locais

Eran as tres da tarde cando a axente regresaba do traballo no seu coche particular pola avenida Miguel Rodríguez Bautista. Alí un individuo comezou a ameazala e gravala co móbil. Ao parecer, non era a primeira vez que tentaba intimidala, a raíz dunha sanción de tráfico.

"Ela estaba no coche parada nun semáforo e o individuo púxose a facerlle fotos e gravala. Ela baixou do coche díxolle que non podía facelo e solicitou que se identificara. El negouse e despois comezou todo", explica Luís Dieste, policía local de Ribeira.

A axente pediu axuda ao seu home, tamén policía municipal, que estaba fóra de servizo e acudiu ao momento. Pola súa banda, o presunto agresor, coñecido polo seu perfil conflitivo, chamou a súa irmá.

"Ao parecer, chamou á irmá para que lle botara unha man. Ela baixou do piso á rúa, enleáronse contra os nosos compañeiros e acabaron detidos", engade o axente Dieste.

Á raíz da malleira, posiblemente por unha chave no puño, o policía ten tres grampas na cabeza e unha ferida na man. A suposta agresora foi detida na rúa no mesmo momento, mentres que o home se atrincheirou na terraza do piso familiar. 

"Meteuse no primeiro piso do domicilio e empezou a insultar e ameazar desde o balcón. Non había maneira de que baixara, puidemos entrar arrestalo grazas a un veciño", di Ricardo Fariña, Policía local de Ribeira.

Os detidos están no calabozo na Policía Nacional de Ribeira. Está previsto que pasen a disposición xudicial nas próximas horas.