Tripulantes do Argos Georgia agardan en balsas a chegada dun buque vigués para rescatalos nas Malvinas
Tripulantes do Argos Georgia agardan en balsas a chegada dun buque vigués para rescatalos nas Malvinas
Tripulantes do Argos Georgia agardan en balsas a chegada dun buque vigués para rescatalos nas Malvinas
Boa parte dos 27 tripulantes son galegos
![](https://img-g24-crtvg.flumotion.com/prog24/2024/20240723/BARCO_ARGOSGEORGIA_frame_0.png)
Os 27 tripulantes do palangreiro Argos Georgia, que nas últimas horas solicitaba axuda a 170 millas ao leste de Stanley, nas Illas Malvinas, tras sufrir unha vía de auga, esperan en tres balsas salvavidas o rescate por parte do buque Robin M. Lee, dunha empresa de Vigo.
O Centro Nacional de Coordinación de Salvamento Marítimo en Madrid (CNCS) sinalou que mantén comunicación directa co seu homólogo MRCC Falkland para coñecer o estado do operativo de rescate e a situación dos tripulantes.
O pesqueiro, con bandeira de Santa Elena e 27 tripulantes a bordo, entre eles dez españois, lanzou unha mensaxe de auxilio cando se atopaba a unhas 170 millas Leste/Sueste do porto de Stanley (Porto Arxentino), nas illas Malvinas.
Ao parecer, tal e como informa Salvamento Marítimo, tiña unha vía de auga provocada por unha tormenta. Finalmente, pasadas as 00:00 horas, a tripulación realizou o abandono en tres balsas salvavidas. Mentres, as condicións na zona son de 35 nós de vento e mar de fondo entre cinco e seis metros.
Salvamento Marítimo tamén detallou que a última conversación que tiveron coa tripulación foi ás 21:00 horas (18:00 hora local). Neste momento, explicou, está a levarse a cabo unha operación de rescate por aire (helicópteros e avións militares) e por mar. Espérase a chegada do buque pesqueiro Robin M. Lee (de bandeira de Illas Malvinas, pero dunha empresa de Vigo) sobre as 10:00 horas.
Tal e como comunicou o Goberno local, a pasada tarde (hora local) a autoridade marítima das illas recibiu información de que este pesqueiro, con 27 persoas a bordo, estaba en apertos e solicitaba asistencia a unhas millas ao leste de Stanley.
Deste xeito, iniciáronse comunicacións entre o Goberno das Illas Malvinas, o de Xeorxia do Sur e as Illas Sandwich do Sur, e tamén co cuartel xeral das Forzas Británicas nas Illas do Atlántico Sur, a Axencia Marítima, Gardacostas do Reino Unido, a compañía de buques pesqueiros e outros buques pesqueiros no mar.
Segundo a información do Goberno de Malvinas, a situación a bordo do Argos Georgia "deteriorouse nas últimas horas", polo que se está levando a cabo unha operación de rescate con medios marítimos e aéreos, incluídos varios helicópteros de procura.
Así mesmo, outras fontes do sector consultadas sinalaron que varios pesqueiros galegos, entre os que se atopan o Robin M. Lee, desprázanse ata o punto para colaborar nos labores de rescate.