Estafa masiva: usurpaban identidades para abrir contas, obter tarxetas e contratar préstamos
O grupo responsable da estafa, desmantelado pola Garda Civil do Milladoiro-Ames, usaba documentación persoal que obtiña de falsas ofertas de traballo
A maioría das vítimas eran da contorna de Santiago e O Barbanza, pero tamén se localizaron algunhas na provincia de Pontevedra e Euskadi
A Garda Civil detivo dúas persoas e investiga outras tres por supostos delitos de estafa, usurpación de identidade, falsidade documental e branqueo de capitais. O grupo utilizaba documentación persoal que obtiñan de ofrecer falsas ofertas de traballo para abrir contas bancarias, tarxetas de crédito e contratar préstamos.
Segundo informa a Garda Civil nun comunicado, a investigación realizada polos axentes de Milladoiro-Ames, no marco da operación SAFAT, desenvolveuse baixo a dirección do Xulgado de Instrución Número 2 de Santiago de Compostela e permitiu esclarecer un total de 62 delitos, con vítimas en Galicia e Euskadi.
A investigación iniciouse no ano 2022, cando unha veciña de Teo denunciou a apertura fraudulenta dunha conta bancaria ao seu nome. Tras analizar a documentación, os axentes comprobaron que se utilizou unha fotografía do seu DNI sen o seu consentimento para formalizar a operación.
A medida que avanzaban as pescudas, detectouse que os fondos obtidos de forma ilícita se transferían a outras contas bancarias tamén abertas fraudulentamente mediante a usurpación de identidades.
Cando as vítimas foron informadas da existencia destas contas interpuxeron as correspondentes denuncias por usurpación de identidade.
Explican que o grupo criminal utilizaba principalmente dous métodos delituosos para obter beneficios económicos. Por unha banda, a apertura fraudulenta de contas bancarias, utilizadas para a contratación de tarxetas de crédito coas que realizaban compras e retiraban diñeiro en efectivo; e por outra, solicitude de préstamos persoais a nome das vítimas, para o que falsificaban documentación, como nóminas e certificados de titularidade de contas bancarias.
Nalgúns casos, os préstamos alcanzaban importes de ata 29.000 euros.
Para obter a documentación persoal dos afectados, a principal investigada ofrecía falsas ofertas de emprego, dirixidas a mozos da súa contorna próxima, amizades e familiares.
Este engano permitíalle acceder aos seus documentos de identidade, que posteriormente eran utilizados para abrir contas, solicitar créditos e dar de alta liñas telefónicas empregadas na comisión dos delitos.
Como parte da investigación, levou a cabo unha entrada e rexistro no domicilio dos detidos na Laracha, onde se atopou documentación falsificada e tarxetas SIM empregadas nas fraudes.
Ata o momento, identificáronse un total de 62 vítimas, e constatouse que o beneficio obtido polos investigados supera os 350.000 euros.
Aínda que a maioría dos afectados residen nas comarcas de Santiago de Compostela e Bergantiños, tamén se detectaron prexudicados en Pontevedra e Euskadi.
