Evacúan un campamento de mozos sorprendidos unha treboada en Huesca
Evacúan un campamento de mozos sorprendidos unha treboada en Huesca
Axentes do grupo de Montaña da Garda Civil rescataron ilesos este venres 16 menores de Zaragoza que participaban na actividade na montaña en Benasque
Este sábado auxiliaron outros 16 que permanecían na zona, para baixar á localidade
![O helicóptero do grupo de Montaña da Garda Civil de Huesca auxilia aos mozos](https://img-g24-crtvg.flumotion.com/prog24/2023/20230708/rescatamozocampamentoHuesca.png)
A Garda Civil rescatou ilesos 16 menores de Zaragoza de entre 15 e os 17 anos e dous monitores dun campamento que o venres pola noite foron sorprendidos por unha forte treboada cando se atopaban acampados na zona dos ibóns de Batisielles, en Benasque, en Huesca, cando realizaban unha ruta de seis días polo GR-11 xunto a outros tantos menores e monitores que pasaron a noite sen risco no lugar.
Unha vez recibido o aviso sobre as 21:55 horas deste venres, efectivos do Greim de Benasque desprazáronse en seis vehículos oficiais ata o final dunha pista forestal para continuar a pé durante unha hora e corenta e cinco minutos e chegar ao lugar onde se atopaban os menores,
Os axentes facilitáronlles bebida quente, roupa de abrigo seca e comida, e tras valorar a situación comprobaron que só había tres tendas de campaña en condicións de uso, polo que optaron por descender con 16 dos menores e dous monitores, mentres que a outra metade do campamento, outros 16 menores, quedaron con dous monitores nas tendas de campaña que estaban en condicións.
Os especialistas e as persoas rescatadas camiñaron durante dúas horas antes de chegar aos vehículos oficiais e trasladarse ao polideportivo de Benasque, onde previamente o Concello e persoal de Protección Civil habilitaran as instalacións para que puidesen pasar a noite.
Á primeira hora deste sábado, o helicóptero da unidade aérea de Huesca con persoal do Greim de Benasque dirixiuse ao lugar no que os outros 16 menores e os dous monitores pasaran a noite nas tendas de campaña e para axudarlles a baixar as mochilas.
Trece dos menores estaban en perfectas condicións para realizar o descenso polos seus propios medios, mentres que outros tres foron evacuados ata a helisuperficie da localidade, onde foron recollidos polos monitores e o grupo que xa estaba alí.
Desde a Garda Civil destacan que todos os menores estaban "perfectamente preparados" para a actividade que estaban a realizar e portaban o material adecuado, pero víronse afectados por unha gran treboada con fortes ventos, o que fixo que a metade das tendas de campaña quedaran inutilizadas.
Unha das monitoras camiñou baixou a choiva ata que obtivo cobertura telefónica e deu aviso da incidencia.