Falece un motorista de quince anos ao estrelarse co seu ciclomotor en Cambados
O mozo sufriu unha saída de vía por causas que aínda se descoñecen o que lle provocou múltiples contusións
Flores no lugar do sinistro mortal
Un mozo de quince anos morreu nun accidente de tráfico no municipio de Cambados. O motorista conducía un ciclomotor cando ía pola estrada provincial EP-9506, ao seu paso por Vilariño, cara a Ribadumia.
O mozo sufriu unha saída de vía por causas que aínda se descoñecen e terminou impactando contra un poste de telefonía, sen que houbese colisión con outro vehículo.
Isto provocoulle múltiples contusións sobre todo na zona do peito. A pesar da intervención dos servizos médicos, non se puido facer nada por salvar a vida do condutor do vehículo que morreu ao instante.
Ata alí desprazáronse efectivos de Urxencias Sanitarias, Garda Civil, Policía Local e o Servizo de Emerxencias do Concello de Cambados. No punto compareceron tamén o alcalde, Samuel Lago, e o edil de Seguridade Cidadá, José Ramón Abal, para interesarse polo ocorrido.
