Insalubridade nunha rúa de Pontevedra polo atoamento do sumidoiro

Un problema na rede de sumidoiro ten alterada a normalidade na rúa Francisco Asorey de Pontevedra. Residuos humanos e augas negras afloran onda o portal do número once, especialmente ás horas de máis uso dos cuartos de baños.

Carmen Piñeiro vive no edificio máis prexudicado: "Ás sete da mañá teño que erguerme para baldear a beirarrúa para que os rapaces e quen entramos non se encontren coa porcallada.
E ás oito e pico, tras o aumento da demanda nos baños, xa teño que volver a baldear. Continuamente, a baldear".

Amosan documentos pedindo a acción do Gobermo municipal e do autonómico ante este ambiente insalubre que arrastran desde hai semanas.

José Silva: "Do Concello viñeron aquí e din que queren levar o sumidoiro para riba. A min iso paréceme imposible. Pero din que iso vai tardar semanas, e xa levamos así tres meses", di José Silva.

O afloramento das augas fecais  implica incomodidades como moverse nun ambiente fedorento.

"O cheiro; eu ás veces non podo estar no portal, teño que marchar camiño abaixo ou para outro sitio, Non se para aquí", sinala Manuel.

"Son unha señora con 85 anos e teño que pasar por aí co bastón co medo de caer", conta Dora. Os afectados urxen a que o Concello arranxe o necesario para que as augas fecais volvan á súa canle pola rede de sumidoiros.