Localizada unha instalación irregular de gasóleo nas obras do tren a punta Lagosteira

A Patrulla Fiscal e de Fronteiras (PAFIF) da Garda Civil da Coruña localizou unha instalación irregular de subministración de combustible no porto exterior de punta Lagosteira.

Segundo relatou nun comunicado este martes a Garda Civil, os compoñentes da PAFIF tiveron coñecemento da posible existencia dunha instalación irregular de subministración de combustible pertencente a unha das empresas que realiza as obras do túnel ferroviario no porto exterior.

Perante esta información, os gardas civís desprazáronse á devandita instalación, concretamente á zona de provisión de materiais existente na boca do túnel ferroviario.

No transcurso da vixilancia, os efectivos observaron un contedor metálico, propiedade dunha das empresas que realiza as obras, que se atopaba coas portas abertas, e comprobaron que no seu interior había unha instalación para a subministración de carburante con dous depósitos plásticos de 2.000 litros de capacidade, respectivamente, e interconectados, con 1.500 litros de gasóleo cada un.

Ademais, carecían da documentación pertinente para a devandita instalación.

A Garda Civil procedeu á confección das correspondentes actas-denuncia por supostas infraccións á Lei de Impostos Especiais e á Lei de Seguridade Industrial de Galicia.