MEGASA rexistrou unha fuga radiactiva o pasado 8 de xuño
MEGASA rexistrou unha fuga radiactiva o pasado 8 de xuño
Actualmente, a empresa ten parada a produción de aceiro e o sistema de extracción de po de fume
A empresa Megasa Siderúrxica, situada no municipio de Narón (A Coruña), sufriu unha fuga dunha fonte radioactiva de Cesio-137 nun forno de arco eléctrico o pasado 8 de xuño.
Esta situación obrigou á parada de produción de aceiro.
"De maneira inmediata, o organismo regulador levou a cabo as comprobacións pertinentes a través da súa rede automática de estacións de vixilancia radiolóxica, confirmando que o suceso non tivera repercusión para o medio ambiente, posto que as medidas de radiación fóra da instalación presentaban valores habituais", informa o Consello de Seguridade Nuclear nun comunicado.
Segundo explica, o incidente foi identificado polos pórticos de detección, ao producirse unha alarma de radioactividade durante a saída dun camión cargado con po de depuración.
Ante este feito, o persoal da instalación detivo a produción de aceiro e a saída de produtos da instalación.
Actualmente, a empresa ten parada a produción de aceiro e o sistema de extracción de po de fume.
Os materiais contaminados atópanse illados e acordoados no interior da instalación.
O CSN enviou o pasado luns un inspector á instalación para comprobar a situación e para poder autorizar a saída dos materiais que non foron contaminados.
Despois desa revisión, o organismo vai requirir a MEGASA que comprobe que "ningún traballador se viu afectado e que elabore un plan para a limpeza e descontaminación da instalación".
