Deteñen un mozo de 19 anos polo suposto homicidio do seu pai en Esteiro

A Garda Civil está a investigar as circunstancias que rodean a morte violenta dun veciño de Muros, localizado na súa casa con signos evidentes de violencia despois de que o 112 recibira unha chamada que pedía asistencia para unha persoa.

Os feitos sucederon esta madrugada en Esteiro ás 00:42 horas e as primeiras investigacións apuntan ao fillo da vítima, de 19 anos, como suposto autor da agresión mortal. Está detido e baixo custodia policial no cuartel de Boiro á espera de pasar a disposición xudicial, para o que o prazo máximo é de 72 horas.

Ao parecer, foi el mesmo o que deu aviso do que pasaba, pero contou que uns ladróns entraran a roubar na casa e atribuíulles o ataque contra o seu pai.

O 061, que recibiu a notificación dos feitos da central de coordinación de Urxencias Sanitarias, desprazou ao lugar unha ambulancia asistencial, persoal sanitario do PAC de Muros e unha patrulla da Garda Civil de Negreira.

Alí atenderon dúas persoas: confirmaron o falecemento dun varón de 59 anos e déronlle a alta ao mozo de 19 anos.

A Policía Xudicial da Garda Civil de Noia fíxose cargo das investigacións e intenta agora determinar o que pasou. Realizou a inspección ocular no interior da casa e recadou probas. O mozo quedou detido e trasladárono ata o hospital Clínico de Santiago, onde ingresou con signos de estar baixo os efectos do consumo de substancias estupefacientes.

Están a realizar a súa avaliación psicolóxica antes de tomarlle declaración nas dependencias da Garda Civil para o seu posterior paso a disposición xudicial.

A vivenda presentaba múltiples estragos. A arma utilizada para causarlle as feridas mortais ao home podería ser unha machada.

Aínda que a chamada sobre a agresión se rexistrou pasadas as doce e media da noite os veciños escoitaron golpes na vivenda unhas tres horas antes e viron que o mozo saíu da casa cara a algunha rúa lindeira, probablemente para agochar a arma que utilizou para atacar o seu pai, que aínda non foi localizada. Pouco despois regresaba ao portal, onde se sentou antes de avisar a emerxencias.

Cando chegaron ao lugar o fillo tiña un corte na faciana que cren que posiblemente sexa autoinflixido.

O home morto estaba tendido na cociña con moitos golpes co cranio aberto. As primeiras investigacións indican que o agrediron polas costas por sorpresa e despois rematárono no chan.

Agora queda pendente a realización da autopsia que podería proporcionar máis datos sobre o crime.

Propietario dun bar

O acontecido en Esteiro propagouse con rapidez pola localidade, que amenceu conmocionada polo suceso. O falecido, Jose Manuel Mayo, alcumado o Peseta, era moi coñecido, xa que durante anos rexentou o bar O Chapa, situado no baixo do inmoble no que se rexistrou a agresión.

Con 59 anos, o falecido estaba prexubilado e o seu establecemento hostaleiro estaba pechado. Os veciños da zona describen o seu fillo como un mozo "problemático" e apuntan que nos últimos tempos as discusións na casa eran habituais.

G. Civil ante o inmoble de Esteiro onde se rexistrou unha morte violenta