Morre un piloto galego nun accidente nun premio de motociclismo na Bañeza, en León
Morre un piloto galego nun accidente nun premio de motociclismo na Bañeza, en León
A vítima, de 47 anos, pertencía á escudería MMG Racing de Culleredo
O participante saíu nunha curva na última volta dos adestramentos e chocou contra un muro
O piloto grovense Javier Álvarez Pérez, da escuadra galega MMG Competición de Culleredo, faleceu este sábado nun dos adestramentos previos á disputa do Gran Premio de Velocidade da Bañeza, que celebra este domingo a súa 63 edición.
O accidente produciuse ao saír coa moto que conducía nunha curva do circuíto urbano que se celebra cada agosto nesta cidade leonesa. Segundo testemuñas presenciais, o piloto, da categoría GP125/Moto3, impactou co seu ombreiro contra unha paca, perdeu o control da motocicleta e chocou de fronte con outra das zonas de protección. A moto quedou encallada e o piloto saíu despedido. Como consecuencia do golpe contra o chan, o home morreu no acto debido a un forte golpe na cabeza.
Os sanitarios intentaron reanimalo durante máis de media hora sen éxito. O accidente provocou a suspensión dos adestramentos pendentes.
Diario de León informa de que este é o primeiro accidente mortal dun piloto na dilatada historia deste Gran Premio que cumpre a edición 63. Os organizadores valoraron suspender a proba do domingo pola conmoción causada polo sinistro, pero decidiron que se manteña a competición.
