Morre un traballador do estaleiro vigués Cardama esmagado por unha prancha de aceiro
Morre un traballador do estaleiro vigués Cardama esmagado por unha prancha de aceiro
A vítima, un peón de 42 anos, faleceu no acto
Os sindicatos do naval anuncian unha mobilización para esixir maiores medidas de seguridade
Un traballador do estaleiro vigués Cardama morreu este xoves nun accidente laboral. O home caeulle enriba unha gran prancha de aceiro e faleceu no momento, sen que bombeiros e servizos sanitarios puidesen facer nada pola súa vida.
Contra as 11 da maña o operario, un peón de 42 anos, participaba na descarga dun camión no estaleiro, na Avenida de Beiramar, momento en que ese pesado bloque de metal lle caía enriba.
Ademais dos bombeiros e dos servizos de urxencias sanitarias do 061, tamén foron mobilizados axentes da Policía Nacional, da Garda Civil e da Autoridade Portuaria.
Mobilización dos traballadores
Tras a morte do seu compañeiro, os traballadores do naval vigués anunciaron que deterán mañá as súas tarefas para marchar desde os diferentes estaleiros ata a sede da Xunta de Galicia, onde esixirán maiores medidas de seguridade.
Segundo informan os tres sindicatos maioritarios nun comunicado conxunto, os cadros de persoal dos estaleiros e da industria auxiliar reuniranse á primeira hora na entrada das súas respectivas empresas para explicar o sucedido e informar do percorrido, que finalizará ás 11:30 na praza da Estrela.
“Hai moito tempo que vimos reclamando maiores medidas de seguridade para o sector, xa que as empresas e a Xunta foron baixando a garda constantemente, ata o punto de levar máis de doce anos sen convocar as mesas do sector naval da ría de Vigo, entre elas a específica de Prevención e Saúde Laboral”, aseguran os sindicatos.
