Unha muller de 45 anos morre ao bater co seu coche contra un camión en Frades

Unha muller de 45 anos faleceu este sábado nun accidente de tráfico ocorrido no concello de Frades. Segundo a Axencia Galega de Emerxencias, o condutor dun camión chamou ás 5:40 horas para informar de que acababa de bater contra un turismo no quilómetro 685 da N-634.

O home asegurou que había unha persoa no coche que non respondía aos seus intentos de contactar con ela. De inmediato, os servizos de urxencia solicitaron a intervención do 061, dos Bombeiros de Ordes, do GES de Curtis e da Garda Civil de Tráfico.

Cando chegaron ao lugar do sinistro, conseguiron abrir a porta do vehículo, pero o persoal sanitario só puido confirmar o falecemento da vítima.

De acordo coa información facilitada pola Garda Civil de Tráfico, o turismo viña de Santiago e o camión dirixíase ao polígono do Tambre. O corpo da vítima foi trasladado ao hospital anatómico forense de Conxo para lle realizar a autopsia.

O condutor do camión, que saíu ileso, deu negativo nas probas de alcol e drogas. Agora, o equipo 6 de atestados do sector de Galicia investiga a posibilidade de que ambos os dous vehículos invadisen o carril contrario.

O lugar do accidente