Falece un mozo ao bater o seu coche contra un camión do lixo en Cerceda
Falece un mozo ao bater o seu coche contra un camión do lixo en Cerceda
O sinistro produciuse de madrugada no lugar de Gosende
Non se descarta que adormecese ou sufrise unha indisposición
Un mozo de 23 anos perdeu a vida esta madrugada nun accidente de tráfico no concello de Cerceda. O sinistro produciuse arredor das cinco e media da mañá no lugar de Gosende.
Un coche e un camión do lixo bateron frontalmente na estrada LC-400 que une A Silva con Cerceda. Como consecuencia do impacto, o condutor do turismo faleceu.
Segundo os primeiros indicios, a vítima invadiu o carril contrario. A persoa que conducía o camión percibiu o errático da traxectoria do coche, pero non tivo tempo para evitalo.
Colisión violenta
A colisión foi tan violenta que o turismo quedou espetado no frontal do vehículo pesado. O condutor do coche quedou inconsciente, pero os servizos sanitarios que se achegaron ao lugar só puideron certificar a súa morte.
A Garda Civil de Tráfico habilitou un carril de circulación mentres non se retiraba o camión da estrada, que necesitou dun guindastre especial.
O sinistro está baixo investigación. Non se descarta que o mozo adormecese ou sufrise unha indisposición, xa que na estrada non se apreciaban sinais de freada.
