Denuncian roubos nos colectores de aceite usado na área da Coruña

No proxecto de economía social Mulleres Colleiteiras denuncian que, desde hai catro anos aproximadamente, lles están a roubar aceite dos colectores que hai instalados tanto na Coruña como na súa área de influencia.

Contan que os roubos adoitan producirse polas noites, pero tamén á luz do día. De feito, son os propios veciños quen dan a voz de alarma. Os roubos, segundo aseguran, están a lles facer moito dano.

Calculan que nos últimos catro anos perderían de ingresar entre trinta e cincuenta mil euros, cos que darían traballo a tres mulleres excluídas.

Amais dos roubos, explican que o incumprimento por parte do Concello de instalar 29 colectores novos na cidade, xa este verán, tamén lles está a prexudicar, e moito, a súa actividade e os seus ingresos.