Multan con 420.000 euros o dono dun edificio en Barcelona por alugueiro turístico ilegal

O Concello de Barcelona sancionou cunha multa de 420.000 o propietario dun edificio que alugaba 14 pisos turísticos de forma ilegal. Case todas as vivendas estaban situadas no distrito de Ciutat Vella.

"Impúxoselle unha sanción bastante exemplar a este propietario", sinalou o tenente de alcalde de Seguridade e concelleiro de Ciutat Vella, Albert Batlle. Ademais, engadiu que a sanción puido impoñerse grazas "a un longo proceso de investigación por parte da Garda Urbana e dos servizos de inspección do distrito".

O dono alugaba todos os pisos do edificio como aloxamento turístico excepto un, onde vivía unha inquilina de renda antiga que xestionaba a entrada e saída dos turistas e encargábase da recollida de chaves. "Tiña moi ben preparado o sistema", indicou Batlle, que engadiu que o sancionado sempre atopaba algunha "escapatoria" para xustificarse e evitar a sanción.

Segundo as investigacións, a propiedade foi evitando expedientes e sancións baixo a alegación de que alugaba os pisos de maneira legal, e que logo os seus inquilinos enganábano e usaban o piso para alugalo a turistas.

O edificio sitúase no número 24 da rúa Ample de Barcelona, onde o propietario alugaba ata 14 pisos, os cales ían activándose e desactivándose das plataformas con nomes, fotos e anfitrións diferentes para sortear unha inspección. Os aloxamentos turísticos anunciábanse a través de páxinas como Booking ou Airbnb, pese a non contar con autorización para realizar este tipo de actividade.

O Concello de Barcelona ten previsto enviar á Axencia Tributaria toda a información contida no expediente para que a propiedade responda ante Facenda se fose necesario.