Nichos do cemiterio moañés de San Xoán de Tirán, en risco de desprendemento

A igrexa románica de San Xoán de Tirán, datada no século  XIII, é unha das xoias arquitectónicas máis importantes de todo O Morrazo, tanto pola súa beleza como pola contorna na que se levanta, asomada ao mar sobre un barranco que se converte nun auténtico balcón con vistas á ría de Vigo.

O cemiterio anexo, do século XVIII, é outra xoia tamén construída sobre o litoral, aínda que desde hai anos unha parte da súa estrutura ameaza con derrubarse sobre o mar. Quen máis quen menos xa o recorda así dende sempre, pero o tempo pasa e o proxecto de conservación segue sen materializarse.

Dende o Concello aseguran que agora, para conceder a licenza, só falta o permiso da demarcación de Costas O de Patrimonio conseguiuse hai pouco, pero a burocracia, sinalan, é lenta en casos coma este.

Este conxunto arquitectónico é único nas Rías Baixas e dos poucos de Galicia construídos tan preto do litoral. Son ducias os nichos que están en risco. A parte traseira, por falta de muro de protección, está a vencer sobre a caída cara ao mar.