O adestrador acusado de abusar dunha menor en Vigo alega que as relacións foron consentidas e que ela xa tiña 16 anos

O adestrador de fútbol acusado de abusar sexualmente dunha xogadora menor de idade en Vigo alegou este xoves que as relacións entre ambos foron consentidas, e que só se produciron cando a denunciante fixera xa os 16 anos de idade.

Así o trasladou durante a súa declaración no xuízo que se celebrou na sección quinta da Audiencia Provincial de Pontevedra, no que explicou que coincidiu coa vítima dende 2016 en varios clubs. O acusado recoñeceu manter unha relación próxima coa moza e explicou que a frecuencia de mensaxes e chamadas se incrementou de maneira progresiva por parte da vítima, chegando esta a declararse e pedirlle "bicos" ou "agarimos".

"Eu dicíalle que tiña 33 anos máis que ela, pero ela insistía", apuntou. Sinalou tamén que era a moza a que insistía para atoparse con el, porque dicía que estaba "namorada", e el sentiuse "presionado".

Reiterou que a relación entre ambos, como parella, non se iniciou ata despois de que ela fixera os 16 anos (en 2019), e remarcou que todos os encontros sexuais que tiveron ata que finalizou a relación en marzo de 2022 foron consentidos. "En ningún momento crin que estaba a cometer un delito (...), o que si temía era a repercusión social", afirmou ante o tribunal.

O acusado explicou que a menor utilizaba a "chantaxe" e as "ameazas" para obrigalo a manter eses encontros e que esta "montaba en cólera" cada vez que el se refería á súa muller ou á súa familia. Así mesmo, sinalou que a relación rematou cando a rapaza chamou á súa esposa para desvelarlle o seu vínculo.

O procesado revelou que a moza contactou con el en vésperas de denunciar os feitos e tamén en agosto de 2023, cando xa estaba aberta a instrución xudicial, para facerlle "chantaxe" e que el lle fixese "caso". 

Na sesión deste xoves tamén compareceron forenses, que confirmaron que a denunciante, que segue en tratamento médico, padece estrés postraumático.

Rebaixa na petición de pena da Fiscalía

Tras a declaración do acusado, a Fiscalía modificou as súas conclusións para pedir a aplicación da circunstancia atenuante de reparación do dano, xa que o procesado consignou 35.000 euros para facer fronte a unha posible responsabilidade civil en caso de condena.

Inicialmente a Fiscalía pedía penas que sumaban 13 anos de cárcere, non obstante, agora rebaixa a petición a 6 anos de prisión por un delito continuado de abuso sexual a menor de 16 anos e outro delito continuado de abuso sexual a menor de 18 anos.

Por outra banda, a acusación particular reclama penas que suman 17 anos de cárcere por dous delitos continuados de abuso sexual con prevalemento, e unha indemnización de 30.000 euros, mentres que a defensa pide a libre absolución.