O Imserso oferta 820.000 prazas turísticas para o programa 2022-2023 sen subir os prezos

O programa de turismo social do Imserso ofertará 820.000 prazas para a tempada 2022-2023. A estas prazas non se lle vai incrementar o prezo respecto do programa anterior. Pódense beneficiar deste programa case catro millóns de persoas, que cumpren os requisitos para acollerse a estas viaxes. 

As prazas iniciais serán ampliables se hai demanda suficiente, informou o Ministerio de Dereitos Sociais e a Axenda 2030.

O Ministerio que dirixe Ione Belarra, di que se agarda que as viaxes do Imserso "cumpran as expectativas" das persoas maiores e colaboren "co mantemento do emprego estacional no sector turístico".

Os beneficiarios destas viaxes comezarán a recibir cartas informativas ao longo desta semana

Ao longo desta semana, os beneficiarios destas viaxes recibirán cartas informativas sobre o inicio da nova tempada, que se desenvolverá dende outubro de 2022 ata xuño de 2023.

A finais de xuño publicarase no BOE a convocatoria que abrirá o prazo de solicitude de alta de novos beneficiarios ou modificación de datos, e non será ata setembro cando se confirme a acreditación dos participantes.

Ao longo da segunda quincena de setembro comezarán a comercializarse as viaxes, que comezarán coincidindo coa temporada baixa turística, a mediados de outubro.

A actual campaña vai pechar con máis de medio millón e viaxes realizadas, segundo o Ministerio

O ministerio de Dereitos Sociais lembra que a presente campaña de viaxes do Imserso vai pecharse con máis de medio millón de viaxes realizadas e cun alto índice de satisfacción por parte dos usuarios.

Dereitos Sociais sinala que as viaxes son seguras para as persoas maiores: dos 420.000 viaxeiros rexistrados ata mediados de maio, só 625 se infectaron de coronavirus.