Os 44 membros dunha banda dedicada a traficar con drogas eluden a entrada no cárcere

Un acordo entre a Fiscalía e os avogados que se ocupan da defensa, co recoñecemento de atenuantes como dilacións indebidas, supuxo unha notable rebaixa de penas para as 44 persoas que este xoves sentaron no banco dos acusados da Audiencia Provincial de Lugo por delitos contra a saúde pública e, algún deles, por pertencer a un grupo criminal.

De feito, aínda que o ministerio fiscal pedía inicialmente penas que oscilaban entre dúas e oito anos de prisión, que sumaban en total 182 anos de reclusión para os investigados; así como multas por un importe que se achegaba aos dous millóns de euros, finalmente, en virtude dese acordo, previsiblemente ningún dos acusados entrará no cárcere por esta causa.

“En principio non”, explicou o letrado César Lodos, que representa dous dos investigados, porque “parte dos acusados xa cumpriu a pena que lle foi imposta en preventiva e os outros non terán que entrar no cárcere, porque carecen de antecedentes”.

Outro dos avogados da defensa, Jacobo Cela, explicou que “practicamente ningún entrará no cárcere, porque estamos a falar de penas que non chegan aos dous anos”.

En canto ao acordo, confirmou que estaba “pechado desde hai meses”, aínda que finalmente levou o seu tempo formalizalo, porque “eran moitos acusados e moitos avogados”.

Á hora de alcanzar ese acordo, precisou ese mesmo letrado, tivéronse en conta atenuantes como “as dilacións extraordinarias” que se produciron durante o proceso de instrución, dado que “este caso vén do ano 2014”.

O avogado Francisco Lago, que representa a outro dos acusados, explicou que no caso do seu cliente tivéronse en conta dúas atenuantes, por unha banda, a súa adicción ás drogas e, por outra, dilacións indebidas. “Obviamente, isto empezou no ano 2014 e estamos en 2023. Lóxico que se acha aplicado esa atenuante”, precisou.

Esta causa é o resultado dunha investigación desenvolvida por axentes do Corpo Nacional de Policía fai oito anos, que se centrou nun primeiro momento nunha familia, unha nai e os seus tres fillos, que vivía nun poboado do municipio lucense de Rábade, porque, supostamente, dedicábase á venda polo miúdo de droga: de cocaína, heroína e haxix.

No rexistro realizado entón nos seus domicilios, os policías encargados do caso atoparon pequenas cantidades de droga, así como útiles para manipular estas substancias e preparalas para a súa venda. Tamén 7.000 euros en efectivo no interior dunha caixa forte.

A investigación seguiu o seu curso e os axentes descubriron que o suposto provedor de haxix da rede estaba en Marbella. De feito, nunha viaxe que realizou a Galicia, foron atopados máis de catro quilos desa droga, cun valor duns 20.000 euros, nun turismo estacionado nun aparcamento público de Santiago de Compostela.

Ademais, as pescudas policiais permitiron poñer ao descuberto ramificacións desta organización nas catro provincias galegas, así como camelos que supostamente traballaban para esta familia en varios barrios da cidade de Lugo.

Das corenta e catro persoas que sentaron no banco dos acusados, con idades comprendidas entre os 28 e os 62 anos de idade, máis da metade xa pasaron uns meses en prisión preventiva por esta causa.