Os seis alemáns acusados de violar unha moza chegan aos xulgados de Palma

Os seis mozos de nacionalidade alemá detidos nun hotel da praia de Palma de Mallorca pola presunta violación grupal dunha compatriota de 18 anos foron trasladados este sábado aos xulgados de Vía Alemaña para prestar declaración.

Os arrestados chegaron ás dez en dous furgóns policiais e saíron co rostro tapado ante unha grande expectación mediática. O Xulgado de Instrución Número 8 de Palma farase cargo do caso.

Cinco dos mozos foron arrestados na madrugada do xoves, cando se denunciou a agresión, e o sexto a última hora dese día.

Segundo fontes da investigación, a moza, de vacacións en Mallorca cunhas amigas, estableceu amizade cun deles e mantivo relacións sexuais consentidas, primeiro na praia e logo no hotel onde se aloxaba con cinco amigos.

Cando os compañeiros chegaron ao cuarto, supostamente algúns violárona e outros consentiron a agresión. De feito, un deles chegou a gravar os feitos. Todos os seus teléfonos móbiles están requisados. 

A Unidade de Atención á Familia e a Muller (UFAM) da Policía Nacional analiza o papel que desempeñou cada mozo neste suceso. Os seis están acusados dun delito de agresión sexual.