Os gandeiros de carne levantan o bloqueo dos matadoiros galegos

A Asociación Gandeiros Galegos da Suprema informou de que os produtores de carne levantaron xa o bloqueo que mantiñan desde o martes da pasada semana sobre a maioría dos matadoiros de Galicia, coa promesa da apertura dunha vía de diálogo para conseguir unha subida do prezo en orixe.

Falan dun desaxuste de 1,50 euros entre o que lles custa producir un quilo de carne e o que ingresan pola súa venda. Ou o que é o mesmo, uns 350 euros de perda por cada animal que vai ao matadoiro. Porque os custos de produción disparáronse nos últimos meses.

O presidente da asociación Santiago Rego confirmou que os gandeiros de carne comezaron onte pola noite a levantar o bloqueo sobre os matadoiros, de modo que esta mañá xa se permite de novo o acceso de vehículos pesados a esas instalacións.

Recoñeceu que, polo menos de momento, só teñen unha promesa de “diálogo”, pero ningunha medida concreta para aliviar a difícil situación que está a atravesar o sector por mor da subida dos custos de produción.