Os produtos 'delicatessen' galegos gozan cada vez dunha maior demanda nas cestas de Nadal

Os produtos galegos teñen cada ano un maior peso nas festas do Nadal. Así o sinalan nas tendas gourmet, onde se encontran en plena campaña de confección de cestas.

Viños como albariños ou godellos, vermús e mais licores son as bebidas máis demandadas, mentres que os queixos, as conservas ou unha ampla variedade de doces tamén adoitan estar presentes nestes agasallos.

Non só aumentou a demanda de produtos delicatessen galegos, senón tamén o valor dos artigos presentes en cada entrega. É o caso dun godello de 500 euros ou dun albariño criado no mar. De feito, estes obsequios poden chegar a sumar ata miles de euros nunha soa cesta.

Dende o sector, destacan tamén que a campaña das cestas de Nadal se adiantou varias semanas con respecto aos últimos anos.