Os sindicatos acusan a patronal do transporte de viaxeiros de piratería e anuncian folga

Representantes dos sindicatos CC. OO., UXT e CIG e compareceron este luns en conferencia de prensa nas principais cidades de Galicia para informar dos motivos que levaron as centrais a convocar unha folga para o 31 de marzo nas empresas de transporte de viaxeiros por estrada, un paro que afecta uns 5.000 traballadores en toda a comunidade.

Aínda que os convenios do sector son provinciais, os problemas do persoal son similares en toda Galicia. En Pontevedra o convenio está caducado desde 2020 e a patronal ofrece unha suba salarial que cualifican de "insultante" do 0,8 por cento, a mesma que ofrecen na provincia da Coruña. En Ourense e Lugo "nin sequera sentan a negociar".

O día da folga haberá concentracións en todas as grandes cidades ás 11:00 horas nas estacións de autobuses, salvo en Pontevedra, que será ás 18,00 horas. En Vigo a xornada de paro coincide coa folga convocada polo persoal de Vitrasa, concesionaria do bus urbano, e os seus traballadores súmanse á protesta.

O responsable da FeSMC de UXT-Vigo, Santos Sánchez, sinalou que o conflito ten como orixe a "intransixencia" da patronal, en que teñen peso determinante dúas grandes empresas, fronte a un con salarios que rozan o mínimo. O argumento da parte empresarial é que "os números non dan" e denuncian o uso dos traballadores empeorando a súa situación para "meter presión" ás administracións das que reciben axudas.