Ósos de santo e chulas voan das pastelerías no primeiro de novembro

Poucas cousas son tan efémeras coma os doces propios de Todos os Santos. Produtos que raramente poden consumirse o resto do ano, polo que voaron dos estantes das pastelerías.

O un de novembro é día de visitar cemiterios, pero tamén pastelerías. Osiños de santo, chulas e calacús véndense a ducias, e canda as receitas máis tradicionais atopamos toda clase de doces decorados con figuras terroríficas.

Doces para lembrar os que xa non están. A globalización chegou tamén á repostería de defuntos. En toda España consúmense xa panellets ou pestiños, pero son as chulas e os ósos de santo os reis das merendas e almorzos destes días. 

As lambonadas entran tamén polos ollos. Escaparates e mostradores sorprenden estes días con decoracións espectaculares. 

Non deixan de ser produtos estacionais, xa que fóra destas datas non é doado mercar chulas e ósos. Afortunados e moi escasos son os que evitan a tentación. 

A demanda disparouse hai xa uns días, e a partir do mércores haberá que despedirse destes produtos ata o ano vindeiro.