Van xa 93 mortos nun bombardeo de Israel contra un edificio no norte de Gaza

Xa son 93 os palestinos mortos, incluídos 25 nenos, nun bombardeo israelí contra un edificio residencial na localidade de Beit Lahia, no norte da Franxa de Gaza, onde desde hai preto dun mes o exército mantén un intenso cerco militar, comunicaron autoridades sanitarias palestinas.

No edificio de cinco andares refuxiábanse "centos de civís desprazados", segundo as autoridades, que denunciaron como o asedio israelí contra os tres principais hospitais do norte de Gaza impide agora que decenas de feridos poidan ser atendidos.

Ademais, medios palestinos informaron dun ataque aéreo pouco despois contra as inmediacións do hospital Kamal Adwan, tamén en Beit Lahia, ao que xa chegaran algúns afectados polo bombardeo.

O exército israelí non informou aínda do ataque, un dos máis mortíferos ata a data desde o inicio da guerra.

Nun comunicado, a oficina de medios do Goberno gazatí asegurou que nestes momentos hai máis de 40 desaparecidos entre os entullos do edificio bombardeado.

"O exército de ocupación (israelí) sabía que neste edificio residencial había decenas de civís desprazados, e que a maioría deles eran nenos e mulleres", criticou o Goberno da Franxa.

"O sistema de traballo de defensa civil foi completamente desmantelado pola agresión israelí no norte de Gaza, o arresto dos seus traballadores e o desprazamento doutros", denunciou o portavoz do servizo de emerxencias, Mahmud Basal, quen resaltou que non deixan de recibir avisos por este ataque en Beit Lahia.

Os vídeos difundidos tras o masacre, en termos utilizados polas autoridades palestinas, mostran decenas de cadáveres envoltos en mantas situados xunto á maraña de entullos do edificio atacado.

Desde hai 25 días, Israel mantén un cerco militar contra o norte de Gaza, en que combina unha intensa campaña de bombardeos cunha incursión terrestre, que causou máis de mil mortos.

Tamén pola noite, outros dous ataques contra vivendas en Beit Lahia mataron polo menos sete persoas, recolleu WAFA, que informou ademais dun incendio causado polo exército, sen especificar se foron as tropas ou un proxectil, contra a escola Al Fajoura, vinculada á axencia da ONU para os refuxiados palestinos (UNRWA).

"Na zona de Jabalia da Franxa de Gaza (norte), as tropas terrestres, en cooperación coas Forzas do Aire, eliminaron aproximadamente 40 milicianos en ataques por terra e aire", informou un comunicado castrense esta mañá sobre as súas actividades no norte, no que non fixeron alusións ao ataque na veciña Beit Lahia.

Ademais, as forzas armadas mataron un número indefinido de milicianos no centro de Gaza, os cales "pretendían plantar explosivos preto das tropas".

Desde que comezou a guerra o pasado 7 de outubro, 43.020 palestinos morreron nunha Franxa de Gaza devastada, a maioría mulleres e nenos, e outros 101.110 foron feridos, segundo o Ministerio de Sanidade do enclave, gobernado por Hamas.