Rescatan o corpo dunha muller que aboiaba na auga dos cantís de Campelo, en Valdoviño
Rescatan o corpo dunha muller que aboiaba na auga dos cantís de Campelo, en Valdoviño
Ata a zona acudiron axentes da Garda Civil, os Bombeiros de Ferrol e o helicóptero Helimer de Salvamento Marítimo, que evacuou o cadáver dunha zona de difícil acceso
![Praia e cantís de Campelo en Meirás, Valdoviño](https://img-g24-crtvg.flumotion.com/prog24/2023/20230701/rescatancorpormullercantisCampelo.png)
Un amplo dispositivo de rescate despregouse na costa de Valdoviño tras atopar un corpo sen vida este sábado na auga.
Sucedeu contra as seis da tarde. Un veciño avisou a Emerxencias de Galicia de que vira o que parecía ser un cadáver aboiando na auga, na zona dos cantís de Campelo. Mobilizouse o operativo de emerxencias que desprazou á zona os Bombeiros de Ferrol, a Garda Civil e o helicóptero de Salvamento Marítimo Helimer.
Tamén recibiron o aviso a Policía Local de Valdoviño, Protección Civil e o GES de Mugardos. Atoparon o vehículo da muller no medio do camiño ás baterías de Montefaro, no alto dos cantís, na parroquia de Meirás.
É unha zona de acceso difícil polo que foi o helicóptero o que sacou o corpo do mar. Os Bombeiros de Ferrol colaboraron desde terra no proceso.
Agora a Garda Civil trata de identificar a muller falecida e investiga o que sucedeu.