Robles ve o envío da Méndez Núñez ao Mediterráneo como "un sinal de apoio" a Ucraína

A ministra de Defensa, Margarita Robles, mostrou a súa preocupación por Ucraína e considerou o envío da fragata F-104 Méndez Núñez ao Mediterráneo unha mostra de "apoio total e absoluto".

Robles estivo no Arsenal Militar de Ferrol para despedir a tripulación da fragata Méndez Núñez, que parte este venres con 232 persoas a bordo a unha misión da OTAN en augas do Mediterráneo co obxectivo de disuadir unha escalada do conflito entre Ucraína e Rusia.

A ministra falou sobre o "gran papel que está a realizar España" en numerosas misións internacionais, na que é "un aliado serio e comprometido", como en Estonia e Letonia.

"Estamos moi preocupados pola situación en Ucraína", recoñeceu, e mostrou o seu "apoio total e absoluto" a este Estado, para o que puxo en valor o papel da F-104 para labores de "disuasión e contribuír á paz".

Sobre Ferrol, unha cidade coa que se sente "moi vinculada", a ministra lembrou que Navantia constrúe na cidade as cinco fragatas F-110 á vez que moderniza as F-100.

"Investir en defensa é investir en seguridade, en paz e en liberdade", declarou Robles, quen asegurou que o compromiso do Goberno é tamén a "creación de postos de traballo", que estima nuns 8.000 na nova serie.